សៀមរាប៖ អ្នកដំណើរបរទេស៦៧នាក់ បានធ្វើដំណើរតាមជើងហោះហើរអន្តរជាតិ Singapore Airline ពីប្រទេសសិង្ហបុរីមកកាន់អាកាសយានដ្ឋានអន្តរជាតិសៀមរាប ខេត្តសៀមរាបនៅថ្ងៃទី១៧ ខែធ្នូ ឆ្នាំ២០២១នេះ។

អភិបាលខេត្តសៀមរាបលោក ទៀ សីហា បានថ្លែងប្រាប់អ្នកសារព័ត៌មានក្រោយពីបានទទួលស្វាគមន៍អ្នកដំណើរមកពីបរទេសជាលើកដំបូងនេះថា ព្រលានយន្តហោះខេត្តសៀមរាបខានបានទទួលភ្ញៀវទេសចរបរទេសអស់រយៈពេល២ឆ្នាំមកហើយ ខណៈលោកសង្ឃឹមថានឹងមានភ្ញៀវបរទេសមកកាន់ខេត្តសៀមរាបជាបន្តបន្ទាប់ឡើងវិញ។

លោកបន្តថា៖ «ឥឡូវនេះសេដ្ឋកិច្ចនៅខេត្តសៀមរាប ចាប់ផ្តើមដំណើរការល្អឡើងវិញជាបណ្តើរៗ ព្រោះភ្ញៀវទេសចរក្រុងស្រុក ក៏បានមកកម្សាន្តនៅខេត្តសៀមរាបកើនឡើងជាបន្តបន្ទាប់ រីឯភ្ញៀវទេសចរបរទេស ក៏បានចាប់ផ្តើមចូលមកទស្សនាខេត្តសៀមរាបយើងដែរ»។

លោកអភិបាលខេត្តសៀមរាបបានបញ្ជាក់ថា នៅថ្ងៃទី១៧នេះ ក្រៅពីក្រុមហ៊ុនអាកាសចរណ៍ Singapore Airlines ក៏មានក្រុមហ៊ុនអាកាសចរណ៍ ឡានម៉ីអែរឡាញ (Lamei Airlines)មួយទៀត ដែលនិងដឹកអ្នកដំណើរមកកាន់ខេត្តសៀមរាបដែរ។

កាលពីថ្ងៃទី១៥ ខែវិច្ឆិកា រាជរដ្ឋាភិបាលកម្ពុជាបានសម្រេចបញ្ឈប់ការតម្រូវឱ្យធ្វើចត្តាឡីស័កសម្រាប់អ្នកដំណើរចូលកម្ពុជាដែលធ្វើតេស្តគ្មានជំងឺកូវីដ-១៩ ដោយគ្រាន់តែពិនិត្យលើបណ្ណបញ្ជាក់ពីការចាក់វ៉ាក់សាំងកូវីដ-១៩ ដូសមូលដ្ឋានពេញលេញ និងវិញ្ញាបនបត្របញ្ជាក់ថាគ្មានជំងឺកូវីដ-១៩ (តេស្ត PCR) ដែលមានសុពលភាពរយៈពេល ៧២ម៉ោង មុនពេលមកដល់កម្ពុជា ដែលទទួលស្គាល់ដោយអាជ្ញាធរសុខាភិបាលនៃប្រទេសសាម៉ីតែប៉ុណ្ណោះ។

មកដល់ពេលនេះមានសណ្ឋាគារ និងផ្ទះសំណាក់ក្នុងខេត្តសៀមរាបបានបើកឡើងវិញជាបន្តបន្ទាប់ដែលមានចំនួនបន្ទប់ជិត៣ម៉ឺនបន្ទប់ដើម្បីត្រៀមទទួលភ្ញៀវទេសចរជាតិ និងអន្តរជាតិដែលមកលេងក្នុងខេត្តទេសចរណ៍មួយនេះ៕